صرخه بسبب صخره

طبعا المفروض ان النهارده العيد والناس كلها مبسوطه , بس أنا متأكده ان مش ده اللى حاصل .

وده لأن كل واحد عنده مشاكله وعنده مشاغله اللى بيفكر فيها على طووول .!

وأنا من الناس دى , بس مش بسبب مشاكلى الشخصيه وبس ..!

ولكن كان بسبب حوار حصل بينى وبين خالى وخالى .

وللأسف كان حوار سياسى , وبالصدفه عرفت معلومه لأول مرة فى حياتى أسمع عنها ..!

بس أنا هبتدى من بداية الحوار تقريبا .

الحـوار الأول

خالى التانى ده بيشتغل فى السكه الحديد والمفروض ان كان عندهم اجتماع لتطوير النظام فيها،

بس الاجتماع كان مع متخصص أجنبى،  لأ وايه كانت معاه واحده للأسف مصريه وكط وجينز ضيق ونظام

وكل شغلتها انها كل ما يتكلم شويه يعينى تصبلوا المايه فى الكوبايه عشان يشرب - يا فقعتى - ده غير الترجمه طبعا ههه

وكان اقتراح خالى كالآتى , انهم بدل ما الأجرة زيادة فى المسافات القريبه - تقريبا 75 قرش - وفى العربيات ب 25 قرش يقللوها شويه عشان الاقبال , والمسافات البعيده مش مشكله تفضل زى ماهيا , وكده يعنى .

قام الخبير ده قالوا .. بعدين بعد 10 سنين كده نبقى نفكر فى الموضوع ده .

الشرح للوضع بما انى واحده مليش فى السياسه ايه بقى !!!

انهم عاوزين يكرهوا الناس فى السكه الحديد وفى الأخر تتخصخص وطبعا الناس ساعتها هتبقى كرهاها فتقول أحسن  .

الحـوار الثانى

خلانى الأثنين كانوا فى العريش , شافوا ايه ؟؟؟!!!!!!!

هناك صخرة كبيرة , طبعا هتقولولى ايه صخره يعنى دى حاجه هايفة هههه ,

لأ مانا جايلكوا فى الكلام أهه دى صخرة تاريخية .

الصخرة دى موجوده من أيام اسرائيل ما - كانت - محتله مصر ,

وأيام معاهدة كامب ديفيد , طبعا كلكوا عارفينها، لما الاسرائليين كانوا بيلموا عزالهم هههههههه

طلبوا من السيد الرئيس - وقتها - ان يتركوا هذه الصخرة , طبعا السيد الرئيس وبحسن نيه قال ايه يعنى صخره يعنى !!!

ووافق , وتم الاحاطه على الصخرة بسلك شائك , ومازالت موجوده حتى الأن ..

لسه لسه مقلتش اللى سبب الألم جوايه , واللى انتوا لسه بتسألوا عليه , مالها الصخره دى ؟

الصخرة دى الاسرائيليين كاتبين عليها بالعبرى - يوما ما سنعوووود - متخيلين المشهد ؟!!!

لأ واللى ضايقنى كمان , ان خلانى دوول أعدوا يعيبوا فى الجيل الحالى..

ده جيل بايظ , ميقدرش يتحمل مسؤؤوليه ولا حتى مسؤليه نفسه لأنه اتعود ان كل حاجه متاحه له ومبيتعبش فى حاجه، 

وماوراهمش غير شرب البانجو , ده مبيصوموش !!!

طبعا أنا مسكتش وقولتهم بيتهيألكوا وحاجات كده , بس برده هما كانوا مصممين .

بجد أنا من ساعتها وأنا عماله أفكر فى الموضوع ده ومضايقنى جدا.

هل احنا فعلا كده - معظمنا يعنى- ؟

وايه اللى ممكن نعمله فى حاجه زى دى ؟

أنا بجد بحب مصر أوى , ونفسى فعلا ان ينصلح حال البلد دى ,

ويبقى العالم الاسلامى هو الرائد فى العالم فعلا ..!!!

يعنى انا لسه برده عارفه النهارده ان باكستان هى أكثر بلد اسلاميه فى العالم

بقى دى مش حاجه تكسف ان مش العرب !!!

مصر لسه محطوط عليها العين وهتفضل كده على مر العصور , بس احنا لازم نعمل حاجه ,

لو مكنتش سياسيه وحرب وكده , يبقى على الأقل نصلح من نفسنا وأى حد بيعمل حاجه غلط يبطلها ويحاول يصلح من نفسه ويتعلم حاجه تفيد مجتمعه وبلده والعالم أجمع , لأن لازم نبقى احنا الرواد مش الغرب ولا الصين ولا أى دوله مش اسلاميه .

بجد كفايه ضياع كده , ياريت نفوووووووووووووووووووووووق.