مواقف مضحكة

من فتره كده المفروض انى غالبا بركب موصلتين عشان أوصل الجامعة وأنا وحظى أركب ايه .. لما بركب المواصله العاديه بتاعتى بنزل فى طلخا غالبا بمشى لحد معدى الكوبرى وأنزل أركب من هناك .
وفى يوم فى المسافه دى هى مش كبيره أوى لاحظت ان فى واحد ماشى ورايه .. بصراحه أنا خفت واللى خوفنى أكتر انه عمال بيعمل صوت غريب موترنى .. ولما جيت عند الكوبرى بصيت ورايه عشان أشوف شكله احتياطى :)
المهم أعدت أدعى يارب ميحصلش حاجه يارب المهم قمت مصدره الكشكول بتاعى أصله من الكشاكيل التخينه دى اللى فيها سلك ههههه
ومسحت الشنطه فى ايدى أوى وقلت عشان لو جه جنبى أديلوا بالكشكول فى وشه على طوول .
فضلت ماشيه كنت حاسه ان الكوبرى بقى طويل أوى ومش عارفه أسرع فى المشى عشان حظى انى كنت لابسه جيبه ساك .
وصلت أخر الكوبرى , نزلت جرى ولقيت عربيه مافيهاش الا ماكان واحد نطيت فيها بسرعه وبووووم خلصت منه .

--------------------------------------------------------------------------------------------------

فى يوم بعد لما قمت من النوم ومحدش كان فى البيت ,كل واحد فى شغله وأنا كنت مستعجله عشان اتأخرت وعندى سكشن ,
لقيت عصفوره عماله تخبت فى النجفه .. دخلت من غير ما حد ياخد باله .. المهم عملت نفسى مش واخده بالى وأنا أصلا فرحانه كويس عشان أبقى أمسكها ألعب بيها شويه , أصلى بحب العصافير أوىىىىىى , المهم بعد ما فطرت ولبست وخلاص خارجه لقيت العصفوره فى الصاله عماله تطير بسرعه جدا بدور على مخرج هههه , المهم وهى فى عز سرعتها دى قامت خابطه فى الشباك الألوميتال واقعه على الأرض .
رحت أبص عليها خفت لاتكون ماتت ,, شفت مراحل وقوعها من الشباك على الكوسى على الأرض وأستلقت على ظهرها .. قومى الله يخليكى ماتموتيش أنا مش ناقصه وخصوصا ان كان بعد موت جدتى الله يرحمها,شلتها على ايدى كده وقلت لنفسى بقى أنا اللى طول عمرى نفسى أمسك عصفوره يوم ممسكها تبقى بتطلع فى الروح .
خدتها وروحت على البلكونه ووقفتها على الصور .. وهى لسه دايخه خالص .. ياستى فوقى الله يخليكى .. المهم بدأت تفوق على بسيط كده .. حيت أقربلها تانى قامت ماشيه خطوتين كده .. سبتها وبعدت حاجه بسيطه وبعدين جيت عشان أمسكها تانى قامت ماشيه خطوتين تانيين .. قولتلها خلاص وبعدت خالص عند باب البلكونه ودخلت وقفلته ولسه ببص عليها من السلك .. لقيها ريحت شويه .. لسه بفتح باب البلكونه ... طــــــــــاااارت هييييييييييييييييييييييييييييييييييييييييييييييييييييه .

-------------------------------------------------------------------------------------------------

الأسبوع اللى فات كان عندى مشكله كده مديقانى شويه .. وفى يوم خارجه مش طايقه حد يكلمنى وعندى استعداد كامل للخناق ههههههه
وكان بابا عطيلى جنيهات فضه أصلها عادوا بيخدوها اجبارى . وأنا عارفه ان السواقين مش بيردوا ياخدوهم .. السواق فعلا مرداش ياخده بس كان فى واحد هو اللى بيلم الأجره, هو مش التباع بس يعرف السواق ... قلتله لو مختوش هبلغ عنك وأنا متنرفزه بقى .
قالى بلغى هههههه .. أخدت الجنيه وعنته ومطلعتش فلوس تانيه .. بعد شويه الواد اللى بيلم الأجره ده طلب منى الفلوس .. قلتله مش معايا ألا أربع جنيه فضه .. هتاخده وتجيب الباقى تاخده متخدزوش انت حر ..... شويه وفقانم قيلى طيب هاتيه قام واخده وعاطى للتباع حنيه ورق من معاه ههههه .
امبارح حصل تقريبا فس الموقف بس مكنش ليا مزاج أتخانق .. عنت الفضه وطلعت الورق عادى.

-------------------------------------------------------------------------------------------------

النهارده وانا جايه من الجامعه .. ركبت معنا ست عجوزه .. بس بسم الله ماشاء الله زى العسل وواعيه بشكل ... ممكن تلففنى مصر كلها وكلامها عسل أوى , كل الناس فى الميكروباص حبوها أوى وقعدوا يقولولها والله انتى عسل يا حاجه ... حتى مش عارف كان حصل ايه كده لاقيتها بتقول والله كل الستات الكبار دول يستاهلوا يرحوا فى ستين داهيه .. كلنا بصينالها .. قامت قايله ما عدا أنا طبعا هههههههههههههههه

-----------------------------

يالا كفايه عليكوا كده ء