انا لله وانا اليه راجعون

من اسبوع عرفت ان صحبتى غادة تعبانه وفى المستشفى وحالتها صعبه
بس مكنتش عارفه عندها ايه , قلت لبابا لانها قريبتنا كمان وقالى هسأل عنها
من كام يوم جه قالى انه قابل باباها وقاله ان الموضوع بقالوا شهر
وان حالتها صعبه وادعيلها
وهو انها كانت عمله عمليه ومنجحتش !!!
من ساعتها وانا زعلانه جدا وكنت عاوزه أروح أزورها لسه عارفه اول امبارح هى فى أى مستشفى
بس قالوا انها فى العنايه المركزه ومفيش زياره !

ومن امبارح وشريط ذكريات كل المواقف بينا عمال يعدى قدامى
وشكلها أخر مره شوفتها فيها وكان بعد فرحها بحاجه بسيطه
وعلى فكره مكملتش سنه متجوزه .!

وكان عندى امتحان النهارده
بعد ماجيت بشويه ماما قالتلى انها ماتت
وقالتلى انهم عارفين من امبارح بس مردوش يقولولى !
مش قادره أوصف احساسى وحالتى لحد دلوقتى عامله ازاى!!!

بس اللى مستغرباله أوى
أول حاجه فكرت فيها بعد ماعرفت
قلت لنفسى انا مش عايزه أموت غير لما أعمل حاجه كويسه لمجتمعى وبلدى
مبقاش زى ماجيت زى مارحت .
مش عارفه مخى بقى عملى أوى كده ليه !!!

الله يرحمها ويرحم أمواتنا جميعا