معرض الكتاب

السلام عليكم

يوم السبت الحمد لله أخيرا بعد رحلة اقناع سنه مع بابا انى أروح معرض الكتاب ..!
التجربه كانت جديده علي وكنت حباها أوى .. يمكن أكتر كمان عشان انا بحب القاهره اوى ونفسى أعيش هناك, ومروحتهاش من زمان
من الرحله يعنى من سنتين تقريبا !

اشتريت كتب يمكن مش كميه كبيره بس انا كنت قاصده لأنى عارفه انى مش هلحق أخلص كل ده فى الإجازة.
وكمان قلت اهو كل مره أبقى أشترى كام واحد على قد احتياجى .
الغريب بقى ان بابا اشترى كتب وصرف اكتر منى

واللى استغربتله اكتر انى مكنتش حاسه انى مبسوطه زى ما كنت متخيله مش عارفه ليه .. يمكن عشان كنت حاسه انى مقيده بناس !!
ويمكن عشان انا مش بحب الزحمه !
ويمكن لأنى تخيلت لليوم شكل وأحداث كان نفسى تحصل ومحصلتش !!

على أى حال انا برده مستمتعه انى عملت حاجه جديده فى حياتى .. الحمد لله .

المشكله بقى فى انى كنت مفكره ان المكان هيبقى انظف من كده والناس بجد مهمله بشكل اللى ياكل ويشرب حاجه يرميها
مع ان فى سله يمكن مش متوفره كتير بس برده مش هيضر لو مسكوها فى ايديهم شويه لحد ما يشوفوا واحده !

وكمان المسجد متبهدل خالص وعاملين خشب كده على مساحه صغيره ف المكان كان زحمه أوى !

ع العموم أتمنى ان شاء الله لما أروحه المره الجايه يبقى أحسن !

سلام