حين أصبح رئيسا للجمهوريه

السلام عليكم

أحب أبارك تانى لكل المصريين اللى بيحبوا بلدهم وكان نفسهم اللى حصل ده كان يحصل من زمان وفرحوا جدا من النتيجه اللى وصلنالها حتى لو مكانوش قدروا ينزلوا زى حالاتى لأى ظرف ما.

البوست ده أنا بفكر أكتبه من زمان أوى من قبل الثوره بكتير ولكن نظرا لظروف خاصه اهمها الكسل الذى نعانى منه جميعا لم اكتبه واخيرا قررت أن أبدأ فيه وأظن ان هذا هو الوقت المناسب.

من منا لايحلم بأشياء يتمنى أن تحدث سواء شخصيه أو عامه تكون مفيده له ولمجتمعه ولبلده بأكملها ؟!

لذلك أود أن أكتب كل ما يخطر ببالى وهذا الأمر لا يقتصر على منصب رئيس الجمهوريه أظن ان من أسباب الثوره أن يتم سحب السلطه الكامله من الرئيس وتكون وظيفته هو أن يلبى مطالب "اوامر" الشعب .. أى أن هذه الأفكار قد تكون صغيره او أشياء خاصه بى وقد تكون كبيره تتوزع على مسؤولين كثيرين فى مختلف المجالات.

أرجو ان يتم الأخذ فى الاعتبار ان كل ما سأكتبه أشياء شخصيه! وليست بترتيب الأهميه!!!

1- طول عمرى بكره كلية الحقوق والمحامين .. بحس ان -بلاش كلهم هقول- أغلبهم حراميه, لدرجة ان مره جالى عريس معاه كلية حقوق ومكنش بيشتغل فى المحاماه كمان مردتش اقابله حتى وقولتلهم ده انا لو كنت مسئوله كنت لغيت كلية الحقوق دى نهائى D: ,

ليه ما يبقاش الحكم مأخوذ من القرآن والسنه, يعنى مثلا اللى يسرق تتقطع ايده .. اللى يقتل يتقتل .. اللى يزنى يقام عليه الحد .... الخ.

2- نفسى الكليات كلها تتجدد .. انا مش قادره انسى منظر الكلية بتاعتنا وخصوصا فى الشتاء لما كان المياه تتسرب من السقف ولا تنزل على مكان فيه أسلاك كهرباء, بجد منتهى الاستهتار .. لا وتلاقى الدكاتره والمعيدين يتلموا ويقعدوا يتفرجوا شويه ويقوموا ماشيين!!

3- نفسى التعليم يتظبت وملاقيش حد بقى فى الاعداديه ومبيعرفش يكتب, بجد انا بقيت بسمع مهازل .. المناهج تتظبط بحيث تبقى مناسبه فعلا للطلبه اللى بيدرسوها .. يعنى ملاقيش حاجات تدرس فى الثانويه العامه بتوع ابتدائى بياخدوها, مش فاهمه ايه المقصود من ده!!!

4- نفسى الناس متكتفيش بالتعليم .. بجد المقوله دى سمعتها من زمان ومن ساعتها وانا مقتنعه بيها جدا "فى فرق بين المتعلم والمثقف", بمعنى ان اللى بتعلمه ده حاجه داخله بس وغالبا كلنا حاسين بده اننا مستفدناش حاجه من المدرسه والكليه, المثقف بقى هو اللى بيشتغل على نفسه وينفذ اللى بيتعلمه فى الواقع.

5- دى بقى حاجه شخصيه شويه  .. الناس تحس ببعض يعنى الشخص يشوف طبيعة الشخصيه اللى قدامه ويتعامل معاه بطريقة الشخص ده مش بشخصيته هو ومش معنى انه طلع فيه حاجه "صفه معينه" مثلا انه يستغلها او يبعد عنه بسببها ممكن جدا العلاقه تفضل مستمره ولكن بحدود او تحاشوا الكلام فى الصفه دى او الاقتراب منها .. اه ومحدش لما يلاقى حد بيسأل عليه كتير يقوم يعمل فيها ياما هنا وياما هناك ويتنك ويبعد اكتر ده هيكره فيك الشخص ده وهيبقى على اد حبه ليك ساعتها هيكرهك او هيبطل يحترمك!

6- من أهم الحاجات بقى .. ياريت ميبقاش كل أماكن تخليص الأوراق أو الأماكن المهمه أو حتى الأماكن السياحيه او الأماكن اللى ممكن الناس بتروحلها رحلات متمركزه فى القاهره بس .... ليــــــه الأماكن دى ميبقالهاش فروع فى كل المحافظات بدل مانتوا عمالين تشتكوا من الزحمه فى القاهره!!

7- نفسى ما يبقاش فى حدود بين الدول العربيه وأى حد عاوز يسافر لأى بلد عربى يسافر فى أى وقت هو عايزه وتذاكر الطيران تبقى معقوله يقدر اى مواطن بدخل متوسط انه يوفرها.

دى بقى مش هحطها من ضمن العدد لأنه كان أول قرار جه فى دماغى ان عاوزه اعمله أول مابقى الريس D:

وهو دعوة كل المصريين بالخارج بكل فئاتهم للرجوع الى مصر واستغلال كل مصرى بكل كفائاته للتنميه بالبلد, ويبقى بعد كده مش المصريين هم اللى مشتتين فى كل العالم كده, لأ تبقى أم الدنيا فعلا يعنى اللى عايز يشتغل هو اللى يجى عندنا... يااااااااارب.

واكيد فى حاجات تانيه لو افتكرت حاجه هبقى ازودها

وانتوا .. بتفكروا فى ايه ؟!