تجميع لمكاسب وخسائر

امبارح كان عيد ميلادى زى مانتوا عارفين وزى ما قولت فى التدوينه اللى فاتت .. المرادى كان مختلف فى حاجه ان انا نفسى مكنتش عايزه افتكره وكنت عايزه اشغل نفسى بأى حاجه عشان كده لكن الفيس بوك كان قايم بالواجب .. يمكن اكتر مره ناس قالولى فيها كل سنه وانتى طيبه، طبعا كنت فرحانه بده وبجد بجد شكرا ليهم كلهم.

فى التدوينه دى عايزه اجمع فيها شويه حاجات سواء حاجات اتعلمتها او كسبتها او خسرتها خلال السنه اللى فاتت على الأقل.

* اتعلمت ان اتحكم فى عصبيتى وردود افعالى الا حد ما، ايوه يمكن منجحتش بنسبه كبيره لكن حاولت والحمد لله قدرت اعمل ده فى بعض المواقف واتمنى انى استمر واقدر اعمل ده اكتر بعد كده.

* اتعلمت انى معتش ادى لحد حجم اكبر من حجمه او ميستحقهوش .. واتعامل مع الناس مش زى مانا معتبراهم لأ يبقى زى ما هم معتبرين نفسهم.!

لأنى لما بعمل كده ممكن ازعل منهم فى حاجات هم أصلا مش عايزنى اديهم الحق ده ومعتبرنى مجرد معرفه وانا معتبراهم اصحاب او اخوات، فبالتالى بزعل وانا مليش الحق انى ازعل.

وبالمناسبه بقيت بكره اللى بيتعامل معايا وبيحسس على كل كلمه وتصرف لأنه متوقع انى هزعل :S

* نفس الحكايه بالنسبه للعائله ومشتقاتهم، قررت انى اتعامل واتعايش على انهم مش موجودين اصلا .. واذا كان على صلة الرحم فافتكر ده لما اجى اعمله بس، لكن معتش اشغل نفسى ده بيعمل ايه ودى بتتصرف ازاى لأن الموضوع ده كان بيأثر عليا جامد وبياخد من اعصابى واستقرار نفسيتى كتير .. ربنا يقدرنى وانجح فى ده اكتر ان شاء الله .

* اكتشفت انى لا منطويه ولا اجتماعيه لأن ده بيتحدد على حسب الناس اللى بتعامل معاهم وعلى حسب الظروف ، لأن معظم الناس بتقول عليا انى منطويه على نفسى ومش اجتماعيه وكده ده حقيقى ولكن مش فى كل الأحوال.

* طول عمرى بقول انى مش بهتم بكلام الناس، لكن اكتشفت انى بهتم جدا وبنسبه كبيره كمان.. وده لا صح ولا غلط ان الواحد يهتم انه يعرف لكن مش المفروض اتأثر بيه او انه يبقى محور اهتمامى واعيش عليه ولا حتى اتصرف على اساسه.

* اكتشفت انى خسرت ناس كتير لكنى مش زعلانه عليهم ولا ندمانه، لأنى كمان بالمقابل كسبت ناس اكتر ويمكن احسن منهم .. واكتشفت ان فى ناس فعلا بتحبنى وبتخاف عليا، ناس فعلا نضيفه من جوه.

نيجى للجانب العملى بقى

* الحمد لله عملت اول كورس فى حياتى واعتقد ان نجحت فيها بنسبه كبيره الحمد لله وده ادانى ثقه فى نفسى اكتر وربنا يسهل ويفتحها عليا وان شاء الله ده يبقى فتحة خير عليا.

* اكتشفت ان الفيس بوك وتويتر بياخدوا من وقتى كتير جدا وكنت بضيع عليهم وقت بالهبل .. قدرت اتحكم فى ده الفتره الأخيره وناويه انى استمر واكتر ان شاء الله واشتغل اكتر واقلل اهتمامى بالسياسه والأخبار أكتر.

* قررت انى اوسع نطاق شغلى شويه واخرج من خندق الثرى دى واتعلم حاجات تانيه وبالفعل بدأت فى شويه حاجات ربنا يعينى واكمل وانجح فيها باذن الله، ولكن احب اوضح حاجه انا عندى حلم بالنسبه لمجال الثرى دى وهو ده اللى كان مخلينى مش عايزه اسيبه ومازلت متمسكه بالحلم ده، وكمان كان خوف من انى منجحش لكن الحمد لله بدأت أكسر الخوف ده جوايا وان شاء الله انجح.

اعتقد ان دى اهم حاجات حصلتلى او مريت بيها .. اتمنى انى اقدر احقق كل احلامى فى السنه اللى جايه دى ان كان ليا عمر وانى فعلا اقدر اعمل حاجه افيد بيها نفسى ومجتمعى.