في رمضان .....

مبدأياً كل عام وانتم بخير .. وعيد سعيد ان شاء الله

- كنت قبل رمضان بفكر أقفل أكونت الفيس بتاعي وفعلاً قفلته ليلتها، كنت بتابع الشغل بس كده علي خفيف، وكانت دي بداية التغيير .. بدأت أنظم وقتي أكتر وأقسمه علي حسب اهتماماتي والأولويات طبعاً مبقاش الحاجة القوية يعني بس بدأت أستغل وقتي بشغل أحسن، واظبت علي الصلاة في المسجد السنه دي أكتر من أي سنه وكمان قرأت عدد كتب أكبر من اي وقت ودي أول نقطة هتكلم فيها عن كتابين من اللي قرأتهم ..

١- في الحلال لرقية طه

بجد كتاب جميل جداً، أينعم كنت بشوفها مزوداها شوية بطبعي أنا واحده اقدر الا حد ما أقول ملتزمه .. لكن فعلاً استفدت من الكتاب كتير وفي نفس الوقت زعلت جداً اني مقرأتوش من زمان لأن فعلا لو كنت قرأته كان يمكن علي الآقل آخر ٤ سنين كانوا هيختلفوا تماماً ولكن مش هقول أكتر من كل شيء بأوان وقدر الله وما شاء فعل وربنا له حكمته في أي حاجة بنمر بيها.

٢- حوار صحفي مع جني مسلم لمحمد عيسي داود

الكتاب فيه كمية معلومات رهيبة في منها اللي أول مرة أعرفه وفي اللي سمعته قبل كده بس بطريقة غلط زي مثلا موضوع الصور والمجسمات كانوا يقولوا غلط لأنك بتحاول تعمل مخلوقات حية أو انها أصنام وما شابه ولكن الموضوع طلع مختلف تماماً وهي أنها بطلع أشعة معينه تجذب الشياطين، وغيرها من المعلومات بس اللي قلبه خفيف مانصحوش يقرأه :)

- بعد حوالي اسبوع من رمضان بدأت أحس بتعب جامد في كتفي ودراعي الشمال، في الحقيقة ربطها بشيء أخر قد حدث لي من فترة، ولكن اتت عندنا طفلة من الجيران كانوا قد أخذوا قطي ليعتنوا به من حوالي ٣ شهور وكنت دائماً ما أسأل عليه يومها لما سألتها قالتلي انهم مشوه، فين؟ امتي؟ ازاي؟ ليه؟ .. لا اجابات ../shock

ظللت ٣ أيام أحاول البحث عنه وأفكر في الكلام .. ٣ أيام لم أتوقف عن البكاء .. ٣ أيام لم أذهب لأصلي في المسجد ... وفي الآخر وجدته محبوساً في البيت المجاور لهم .. منتهي التعب وعدم النظافه ولا أعرف كم المده التي لم يأكل فيها ربما اسبوع أو أكثر، إعتذرت له وأخدته وقمت بتنظيفه، يوم، يومان، ثلاثة لا يأكل، يشرب بصعوبة، دايخ .. ذهبت به لدكتور قال ان عنده نزله شعبية، اداله ٣ حقن وانا كملت ٤ أيام بعد كده انا اللي كنت بديلة، الا حد ما بدأ يتحسن، ومن يوم ما لاقيته الألم معدش بييجي تقريباً.

التجربة دي بينتلي اد ايه فعلا لما بتحب حاجة وبتتعلق بيها بتقدر تحس بيها عن بعد وكمان خليتني أفهم احساس الأم بأولادها .. لاني فعلا بعتبرة ابني /XD

- الحاجة اللي مخلياني مبسوطة أكتر اني متابعتش مسلسلات وكنت باجي من التراويح أنام أحسن حاجة :)

- عرفت قيمتي الحقيقية عند ناس كتير، وعرفت حقيقة ناس أكتر، اكتشفت ان القوقعه اللي كنت حابسه نفسي فيها أحسن وأأمن ١٠٠ مرة من العالم اللي بره مهما كان فيه من حاجات مغرية وحلوه .. شكلي دخلتها تاني :)
ومن كتر المواقف والتجارب اللي مريت فيها ال ٤ سنين اللي فاتوا وصلت لحالة من الزهد في الدنيا لدرجة اني مبقتش بدعي بحاجة لنفسي ولا عاوزه حاجة من الدنيا وأغلب أو كل دعائي استغفار .. مبقتش عاوزه غير اني أروح لربنا وانا نضيفه ويكون راضي عني ويدخلني الجنه :)

أقدر أقول ان رمضان السنه دي فعلاً مختلف بالنسبالي، وكان بمثابة فتح صفحة جديدة مع نفسي -أتمني انها تستمر :) - وهو ده فعلا اللي أنا كنت محتاجاه، ربنا يتقبل منا ومنكم الصيام والقيام وصالح الأعمال  /please

*لسبب ما اضطريت افتح الأكونت قبل المعاد المكرر ب ٣ أيام .. بس خير ان شاء الله ميأثرش علي ترتيبي لمواعيدي :)

عيد سعيد /bye