الفراغ العاطفي

لسبب ما امبارح خطر في بالي احنا ليه أوقات كتير بنحس بفراغ عاطفي ؟!
هل ده بيحصل للناس اللي مش مرتبطه بس؟
الحقيقة إكتشفت ان كتير بيحسوا بيه، فيهم نسبه كبيرة مرتبطين ومتجوزين كمان .. يعني كون يبقي معاه شخص من الجنس الآخر بيقولك كلام حلو، أو بتقضوا مع بعض أوقات رومانسية مش بالضروري يشبعك عاطفياً.
احنا أغلبنا عندنا جفاء، جفاء المشاعر بيخلينا مبنعرفش بنقول كلام حلو، مش للطرف التاني اللي معانا بس، لأ ده حتي لأصحابنا، قرايبنا أو معارفنا.
كتير ببنقد البنات اللي بيغنوا علي بعض، بمعني اللي بتقول يا حبي، يا حياتي، يا جميل، وحشاني لصاحبه أو واحده تعرفها وممكن يكونوا لسه كانوا مع بعض من يومين.
بس الحقيقة إكتشفت ان مثل هذا الكلام بيشبع شئ جوانا، شئ مهم إنه يعرفنا اننا عندنا مشاعر تستحق تظهر، تستحق نبينها ونخرجها، اه مهم انها متظهرش عمال علي بطال بس محتاجة تظهر من وقت للتاني، تخرج احنا مش محتاجين اننا ناخد ونستقبل مشاعر بس، لأن الأخذ بس ممكن برده يخلينا نشعر بالفراغ العاطفي ده وعلي طول هنتوجة لناحية علشان احنا مش مرتبطين، ولكن في الغالب مش ده السبب الرئيسي.
احنا لو حد من قرايبنا قالنا كلام حلو بنستغرب، وبنقول الناس دي أوفر أوي، الناس دي بتجيب الكلام ده منين، الناس دي بتعرف تقول الكلام ده إزاي .. لو فكرنا فيها مش بالضروره هنلاقيهم ممروش بمواقف صعبة، أو ظروف ضغطت عليهم، أو إن أهلهم بيتعاملوا معاهم صح .. ولكن الناس دي عندها قدر من الاستواء النفسي.
احنا محتاجين نحب نفسنا، نحب كل حاجة حوالينا، نخرج أي طاقة سلبية جوانا، بطلع أي شحنه ناحية أي حد في حياتنا بس مش علي نفسنا.